DMPA: Incredible Injectables!

Paano Gamitin ang DMPA?

Paano Gumagana ang DMPA?

Pinipigilan nito ang ovulation. Hindi maglalabas ng hinog na itlog ang obaryo kaya walang mapepertilisa ang semilya sa panahon ng pakikipagtalik.

Pinakakapal o pinapalapot nito ang mucus na nakabalot sa bukana ng matris (cervix) na magsisilbing harang upang pigilan ang pagpasok ng sperm ng lalaki sa matris.

Pros and Cons

96% itong epektibo.
Tatlong buwan kang protektado sa di planadong pagbubuntis. .
Apat na beses lang sa loob ng isang taon ang pagtuturok.
Hindi nakakahadlang sa pagtatalik.
Pwede para sa mga bagong panganak at nagpapasusong ina.
Pwede para sa mga babaeng kailangan ng contraceptive na walang estrogen.
Nakakatulong sa pag-iwas ng pagkakaroon ng kanser sa suso, matris, at obaryo.

Kailangan ng reseta.
Dahil agad na nare-release ang hormones sa katawan pagkatapos ma-inject, maaaring maging sanhi ang DMPA ng pagbigat ng timbang at magdulot ng pagkahilo, pananakit ng ulo, pagduduwal, at pananakit ng sikmura. Pwede rin nitong maapektuhan ang mood at sex drive.
May kaakibat na kirot pag nagpa-injection at makakaramdam ng pananakit ng braso na pwedeng tumagal ng ilang araw kapag naiturok na
Pwedeng makaranas ng pagbabago sa regla (di-regular, patak-patak, walang regla, malakas na regla).
Sa oras na ihinto ang pagpapaturok, maaaring umabot ng isang taon bago tuluyang bumalik nang normal ang regla kaya mas matagal bago posibleng mabuntis.
Hindi ito pwede para sa mga may sakit sa puso o highblood. Maaari rin itong magpataas ng tsansa ng pagnipis ng mga buto.
Wala itong kakayahang protektahan ang babae mula sa mga sexually transmitted infections (STI).

Sino ang Pwedeng Gumamit ng DMPA?

Mga Dapat at Hindi Dapat Gawin Kapag Nagpapaturok ng DMPA

Dapat Gawin

Relax lang kapag tinuturukan ng DMPA. Ilang segundo lang naman ang itatagal nito!
Pagkatapos ang unang injection, gumamit muna ng condom sa loob ng isang linggo kapag makikipagtalik o di kaya naman ay iwasan munang makipagtalik.

Hindi Dapat Gawin

Huwag na huwag kakalimutang bumalik para magpaturok sa takdang oras (pagkatapos ng 12 weeks o tatlong buwan) para mapanatili ang pagiging epektibo nito.
Huwag itong ipaturok kung ikaw ay may history ng sakit sa puso o highblood.

Frequently Asked Questions

Ano ba ang DMPA?

Ang DMPA o mas kilala sa tawag na injectables ay isang hormonal contraceptive na ini-inject para pumigil sa obaryo na maglabas ng itlog upang maiwasan ang pagbubuntis. Pinapakapal din nito ang mucus sa bukana ng matris (cervix) at pinananatiling manipis ang dingding ng matris para hindi magtagpo ang semilya at itlog.

Ang pagpapa-inject ay ginagawa sa tulong ng isang doktor,nars o midwife kada 3 buwan o 12 weeks. Sa kabuuan, ini-inject lamang ito nang apat na beses sa isang taon.

Gaano ka-epektibo ang DMPA?

Ang DMPA ay 96% na epektibo sa pagpigil ng pagbubuntis.

Saan ako makakakuha ng DMPA?

Kung may reseta, maaari itong bilhin sa mga botika at pwedeng ipaturok sa ospital o clinic na malapit sa iyo. Maaari din itong makuha at maipaturok nang libre sa mga health centers, health clinics, government hospitals at ibang clinics at non-government organizations (NGOs)NGOs.

Ano ang mga benepisyo ng paggamit ng DMPA?

Bukod sa epektibo itong kontraseptibo, reversible rin ito. Ibig sabihin pwede mo itong ihinto sa oras na gustuhin mo nang magbuntis.

Dagdag pa rito, kung makakalimutin ka sa pag-inom ng pills araw-araw at hindi pa komportableng magpalagay ng implant o IUD, para sa iyo ang DMPA dahil ang kailangan lang gawin ay bumalik sa clinic o ospital para magpaturok pagkatapos ng tatlong buwan.

Hindi rin ito nakakaapekto sa pakikipagtalik at pwedeng-pwede ito para sa mga babaeng kailangan ng contraceptive na walang estrogen.

Pwede bang magpa-inject ng DMPA kapag kapapanganak pa lang?

Kung kapapanganak pa lamang at nagpapasuso, mas mabuting maghintay ng anim na linggo bago magpaturok nito. Kung hindi naman nagpapasuso, pwedeng magpa-inject nito pagkatapos ng tatlong linggo pagkapanganak. Maganda ring kumonsulta muna sa iyong doktor, trained na nars o midwife tungkol sa pagpapa-inject.

Masakit bang magpa-inject?

Oo, masakit ang magpa-inject at posibleng makaramdam ng pagbigat ng braso na maaaring tumagal nang ilang oras hanggang ilang araw. Konting tiis lang sa sakit dahil sulit naman ito sa huli!

Pwede bang magpa-inject ng DMPA kahit nireregla?

Pwedeng-pwede itong i-inject kahit kailan. Ang doktor, trained nars o midwife naman ang magtuturok nito kaya walang dapat na ikabahala.

Ano ang side effects ng DMPA?

Ilan sa mga common na side effects ng pagpapa-inject ay ang mga sumusunod:

Hindi regular o hindi inaasahang pagdurugo.
Paglakas, paghina, o tuluyang paghinto ng regla isang taon matapos ang sunud-sunod na pagpapa-inject.
Pagbabago sa timbang
Pagkahilo
Pananakit ng ulo
Maaaring mas tumaas ang tsansa ng pagnipis ng mga buto. Maaaring uminom ng calcium supplements para mapigilan ito.

Bagman hindi lahat ay nakakaranas nito, kadalasan namang nawawala rin kapag nasanay na ang katawan.

Pag hininto ko ba ito mabubuntis ako agad?

Dahil reversible ang kontraseptibong DMPA, pwede mo itong ihinto sa oras na gustuhin mo nang magbuntis. Pero dahil may tsansang hindi agad bumalik ang normal na cycle ng regla, maaaring hindi agad-agad mabuntis pagkatapos ihinto ang DMPA. Pwedeng abutin ng isang taon bago mabuntis mula noong huling turok.

Protektado ba ako ng DMPA mula sa mga sexually transmitted infections (STI)?

Hindi. Tanging sa pagbubuntis ka lamang nito kayang protektahan. Gumamit din ng condom para makasiguro na hindi ka mabubuntis at mahahawa ng mga sakit.