Lamang ang may Alam Pagdating sa HIV!

Ang HIV ay HINDI naisasalin sa ibang tao sa pamamagitan ng hangin, paghipo, luha, laway, sipon, ubo, pawis, o maging ihi. Maaari lamang makuha ang HIV mula sa infected na dugo, tamod, vaginal fluid, anal mucus, o gatas ng inang may HIV. Tatlo lang din lamang ang modes of transmission ng HIV:

• Hindi-protektadong pakikipagtalik.
• Paggamit ng karayom na ginamit din ng taong HIV positive.
• Naipapasa ito ng nanay na may HIV sa kanyang sanggol na anak pagkapanganak o kapag nagpapa-breastfeed.

Ang human immunodeficiency virus o HIV ay isang virus na umaatake at sumisira sa immune system ng isang tao. Kapag hindi ito naagapan ng gamot, maaari itong humantong sa kondisyong tinatawag na Acquired Immunodeficiency Syndrome o AIDS kung saan talagang mahina na ang immune system ng taong nahawaan ng HIV virus.

Mahalagang tandaan na hindi lahat ng taong may HIV ay may AIDS pero lahat ng taong may AIDS ay mayroong HIV.

Walang pinipiling hawaan ang HIV. Ang pagtawag sa HIV na isang "pambakla" o "pang-LGBT lamang” na sakit ay hindi makakatotohanan. Pinapalaganap lang nito ang mali at nakapipinsalang stereotype laban sa mga taong may HIV/AIDS at maging sa mga miyembro ng LGBTQIA+ community.

Bagamat ang mga kaso ng HIV/AIDS ay mas madalas na nakikita sa mga males having sex with males (MSM), hindi ibig sabihin nito na sila lamang ang maaaring mahawa nito. Kahit sino — anuman ang sexual orientation, gender identity, sexual expression, mayaman, mahirap, may pinag-aralan o wala — ay maaaring makakuha ng HIV.

Naikakalat ang HIV sa pamamagitan ng dugo, NGUNIT hindi nangangahulugan na kayang maghatid ng HIV ang mga lamok o mga insektong nabubuhay sa pagkain ng dugo. Maraming pag-aaral na ang nagpatunay na hindi maisasalin ang HIV sa pamamagitan ng kagat ng lamok.

Hindi mabubuhay ang HIV virus sa tubig o maging sa pagkain, kaya hindi ka mahahawa ng HIV kung maliligo ka sa beach, swimming pool, shower areas, sa paghuhugas ng damit, o maging sa inuming tubig. Hindi mo rin makukuha ang HIV sa pagkain.

Maaari ka lamang mahawaan ng HIV kung ang karayom na ginamit ng tattoo artist sa iyo ay ginamit na nya sa pagta-tattoo sa isang taong HIV positive, at kung ang karayom na ito ay hindi sterilized. Siguraduhing bago at hindi pa nagagamit sa iba ang karayom na gagamitin para sa iyong tattoo session.

Wala pa ring gamot na tuluyang magpapagaling sa taong may HIV/AIDS. Ngunit, may mga antiretroviral treatment o ART na ngayon na nagpapabuti at nagpapahaba ng buhay ng mga taong mayroong HIV;

Prevention is always better than cure. Ang tamang pag-iwas sa HIV ay mas mabuting gawin sa ngayon at mas madaling gawin kaysa sa panghabang-buhay na pangangalaga ng katawan kapag nagka-HIV.

Ang pinakamabisang paraan upang malaman kung ikaw ay may HIV ay ang pagpapa-HIV test.

May mga taong ilang taon nang may HIV ngunit wala namang nararanasang mga sintomas.

May mga tao ring nagkakaroon ng mga sintomas makalipas ang 2-4 linggo pagkatapos magawa. Ang mga karaniwang sintomas na ito ay katulad ng mga sintomas ng trangkaso: maaaring may kasamang lagnat, pamamaga na mga kulani, namamagang lalamunan, mga pantal, at pananakit ng kalamnan. Karaniwang mawawala ang mga sintomas na ito pagkalipas ng ilang linggo at maaaring hindi na muling lumabas sa loob ng maraming taon kaya maaaring akalain na wala silang anumang sakit. Kaya da best pa rin na magpa-HIV test kung sexually active.

Hindi nakamamatay ang HIV kung ito ay maaagapan. Sa tulong ng HIV medication gaya ng antiretroviral therapy o ART at healthy lifestyle gaya ng pag-eehersisyo, pagkain ng malulusog na pagkain, at pag-iwas sa mga bisyo, mas humahaba at nagiging malusog ang buhay ng isang HIV positive na tao. Ayon sa research, ang isang taong may HIV na maagang makakapagsimula ng treatment ay maaaring mabuhay nang matagal tulad ng taong walang HIV.

Nakamamatay lamang ang HIV kapag lumala ito at hindi parin ginagamitan ng treatment. Tinatantiyang hanggang tatlong taon lang mabubuhay ang taong may AIDS kung wala siyang matatanggap na kahit anong treatment dahil sa iba’t ibang sakit at opportunistic infections na sisira lalo sa immune system. Kasama na sa mga sakit na ito ang tuberculosis, pneumonia, heart disease, kidney disease, cancer, at iba pa.

Ang pinakamabisang paraan para maiwasan ang pagkakaroon ng HIV ay ang hindi pakikipagtalik o abstinence. Kung makikipagtalik naman, dapat ay mag-practice ng safe sex sa pamamagitan ng paggamit ng condom at pakikipag-sex sa iisang tao lamang na walang HIV.