Trot o Charot: Everything about Regla

Ang regla ay ang kumapal na dingding ng matris na hindi nagamit sa pagbubuntis kaya ito nalulusaw at lumalabas sa puwerta. Hindi ito maruming dugo.

Walang kinalaman ang regla sa paglaki ng puson. Ang pagkain ng walang kontrol ang nakakalaki ng puson.

Ang hindi pagreregla ay hindi nagdudulot ng cancer. Ipinapayong kumonsulta sa iyong OB Gyne kung may mga ganito ka pang pag-aalinlangang gustong mabigyan ng kasagutan.

Kapag hindi nireregla, hindi ibig sabihin na may namumuong regla sa loob ng matris. Sa halip, kabaliktaran ang nangyayari – nananatiling manipis ang dinding ng matris dahil walang namumuong dugo dito. May maaaring iba’t-ibang dahilan para dito, ngunit ang karaniwan ay dahil sa paggamit ng kontraseptibo. Kung hindi dinadatnan ng regla at hindi naman gumagamit ng kontraseptibo, ipinapayong kumonsulta sa doktor.

Ang totoo ay malakas magregla ang mga babaeng may myoma. Lumiliit din ang chance na magka-myoma ang babaeng hindi nireregla dahil walang pagkapal ng dingding ng matris kung saan maaaaring tumubo ang myoma.

Walang kinalaman ang pagsakit ng ulo sa hindi pagreregla. Maraming dahilan kung bakit sumasakit ang ulo. Isa na riyan ang kakulangan ng tulog, pabagu-bagong lagay ng panahon, dehydration at pagkalipas ng gutom, stress, at maaari rin dahil sa pagbabago ng level ng hormones ng katawan ng isang babae.

Walang kinalaman ang pagtalon sa baitang ng hagdan sa tagal ng iyong regla, depende ito sa katawan ng babae.

Ang pagkinis ng kutis o hindi pagkakaraoon ng pimples ay walang kinalaman sa pagpunas ng regla sa mukha. Ang pagkakaroon ng pimples ay dahil sa hormones ng katawan ng isang tao. Baka lalo pang mag-breed ng bacteria ang mukha mo kapag nagpahid ka ng dugo dito.

Walang kinalaman ang pagkain at inumin sa paghinto ng iyong regla.

Ang paliligo habang may regla ay hindi nagdudulot ng masama o kaya pasma sa katawan. Sa halip ito ay paraan ng pagsiguro sa kalinisan ng katawan upang maiwasan ang impeksyon at sakit.